My Morning\go to Makeup look

السلام عليكم , نزلت قبل كم يوم على الانستقرام هالصورة ,حبيت انكم تعرفون عن موضوع البوست اليديد و اللي بيكون عن مكياج الصباح أو اليومي.. الصورة تضم كل الأشياء اللي استخدمها للوك ..

أول شي أبدأ بغسول أنظف فيه ويهي, وبعدها أرطبها بأي مرطب يناسب لبشرتي, ومهم تغسلين ويهج و ترطبينه قبل الميكب عشان يظل ثابت فترة أطول.

اول شي أستخدم بي بي كريم من بوندز لأنه خفيف عالبشرة و يغطي و نفس الوقت يعطي لوك طبيعي للبشرة والأهم فيه حماية من الشمس , وأذا كان الفاونديشن او البي بي كريم اللي تستخدمينه ما فيه حمايه من الشمس , ضروري تحطين واقي شمس اومرطب فيه حماية عشان لا تتأذى بشرتج , أرجع للبيبي كريم صراحه صار لي 3 شهور استخدمه وحبيته وايد مو غالي أبد و تلقينه ف أي جمعية , في له درجتين لايت وميديم وأنا أخلطهم عشان يعطي لون بشرتي و استخدم هالفرشاة من بي اتش للفاونديشن.

بعدين أحط كونسيلر حاليا استخدم فت مي من ميبيلين , حلو حق استخدام يومي ما ينفع للي عندهم هالات غامقه إلا استخدموا كوركتر قبله, أحطه تحت عيوني, خشمي, الجبهه و شوي ع الذقن و أطبطب عليه بهالفرشاة من بي اتش,ملاحظة أخيرة هالكونسيلر ينفع هايلايت بعد.

بعد ما أحط البي بي كريم أثبته ببودرة صبايا من مكياجي , حلوة تعطي لوك المات , اذا ما كنتي تحبين اللوك الديوي أوبشرتج تدهن عند التي زونز هالبودرة وايد بتناسبج.

أرسم حواجبي ببودرة سيقما و فرشاة مشطوفة من مكياجي, معلومات أكثر و رأيي فيها فالانستا تحصلونها.

ني للعيون , طبعا للوك صباحي أكيد ألوان الشادو بتكون فاتحه و طبيعيه , أستخدم باليت ريفليوشن , جمييلللل أقدرأسويي أكثر عن لوك بألوانه, الصف اللي فوق مات و اللي تحت شيمر, أول شي أخذ بفرشاة مسطحه الشادو الابيض الشيمرأسوي هايلايت تحت حواجبي و عند مدمع العين , بعدين بفرشاة دمج أخذ شادو مات لونه فاتح أطبقه على الجفن كامل يكون كقاعدة للشدو وعشان يثبته بعد, بعدين أخذ اللون البني و احطه ع كسره العين وادمجه,بعدين اخذ لون أغمق مثل اللي محددتنه ع الباليت أحدد عظمة العين أكثر و أبرزها, طبعا كل الالوان اللي ع الجفن مات , و اخرشي أخذ فرشاة دمج نظيفه و أدمج كل الألوان مع بعض.

بالنسبة للأيلاينر , ما أحب أحط للصباح أحسه كثيرللوك صباحي , بس كل وحدة و اللي ترتاح له , اذا حسيت أني محتاجه بس أحط كحل أوشادو أسود على خط الرمش اللي تحت و أموهه بفرشاة.

نرجع للويه و نوصل للبرونزرحبيب قلبي , أستخدم برونزرمن ماك dark deepest روعهه لونه يجنن وفيه لمعه خفيفة ثباته حلو صراحه كنت أكرهه البرونزرات لانه دوم أخذ درجه ما تطلع علي حلوة بس هذا غييرخلاني أعشق شي اسمه برونزرلدرجه مرات لما اتكاسل أحط ميكب احط هالبرونز و يصير ويهي ش زينه :").

بعدين أحط بلاشراسمه بيتشي من ماك لونه على اسمه مشمشي. 

أستخدم ماسكارا من ذا بالم, سوادها خيال و تقوسالرموش بشكل جميل و تثبتها طول اليوم عيبها الوحيد أنا ماتنشال بسهوله تسود العيون وتسوي حوسه:).

أخرلمسه اللي هي الروج, هالأيام صايرة أحب هالروج من ماك وما أحط الا هو , تفاصيل أكثر و رأيي فيه ف الانستا .

وهنيه أكون خلصت اللوك, ان شاءالله يعجبكم وشاركوني رأيكم و اقترحاتكم للوك صباحي أفضل.

My favorite perfumes..عطوراتي المفضلة

مساء الخير,

بتكلم اليوم عن العطورات اللي أحبها تقريبا من 4 أشهر , بطبيعتي أحب العطورات اللي ريحتها روز و تكون لا قوية و لا خفيفة يعني ريحتها متوسطة.

أول عطر و يعتبر الأفضل باالنسبة لي اللي هو coco chanel Mademoiselle ريحته كلاسيكية و ناعمة , بريحة الياسمين و المسك الابيض تجنن و يبقى فترة طويلة من بعد ما تحطينه. ما أذكر سعره بس أتوقع 400 و شي بس اذا طلبتيه أون لاين بيكون أقل.

ثاني عطر  lacoste sensuelle  ريحته أقوى من شانيل , أحب أحطه لما أكون ف البيت , ريحته زهر و عنبر أبيض جميل .

أخر عطر و هوEmotion من الرصاصي ريحته قوية  صح ما أحب الريحة القوية بس هذا غير حبيته ريحته غريبة و حلوة بنفس الوقت, فيه شوي من ريحة المسك و العود بس الريحة الطاغية هي الزهر.

و هذي عطوراتي اللي أفضلها , أتمنى تعجبكم و اذا جربتم منها أعطوني رايكم ف الكومنت و شاركوني عطوراتكم اللي تحبونها.

Face care ..عنايتي بوجهي

السلام عليكم و رحمة الله و بركاته,
اليوم حبيت أنزل لكم تدوينة بالعربي عن كيفية عنايتي بوجهي, كلكم عارفين أهمية أن تكون بشرة وجهنا جميلة و ناعمة و خالية من أي شوائب مهما تكوني جميلة اذا كانت بشرتت تعبانة راح يأثر كثير على جمالت و على نفسيتت لذلك لازم تعتني فيها يوميا و تحافظين على نظارتها, نظافتها و جمالها و تكوني واثقة من نفست.

نبدأ أول شي بالغسول اليومي , أنا أستخدم clean and clear جدا جميل ينظف الوجه تماما من أي أوساخ أو بقايا ميكب. أستخدمه يوميا قبل لا أنام , بعد ما أمسح الميكب , أحطه عالبشرة أدلكه بلطف لمدة دقيقة لدقيقة و نص , و ما أقرب حولين العينين نهائيا بعدها أغسله بماء بارد.

بعد ما ينشف وجهي أمسحه بالأسكينول باستخدام قطنة ناعمة, فايدة الأسكينول أنه ينعش الالوجه و ريحته جدا جميلة , و أمرره ايضا ع الرقبة يساعد في تفتيحها اذا تحسينها اسمرت من الجو او سوت مثل الخطوط الغامقه بسبب الشيلة و الحجاب.

مهم بعد الغسول أنت ترطبين البشرة و الا بتكون جافه و يمكن تحسس , أنا أستخدم مرطبين للمساء nivea soft لأنه ثقيل شوي و حلو أحطه بعد الغسول عشان يرطب الوجه من المساء للصباح , ف الصباح و قبل ما أحط الميكب أستخدم مرطب جونسون للأطفال جدا ناعم و خفيف و ما يدهن لذلك أستخدمه الصبح عشان بعد ما احط الميكب ما يدهن معاي بعكس nivea soft.

البشرة حولين العين جدا حساسة لذلك لازم نرطبها دايما , أنا استخدم himalaya under eye cream جدا جدا جميل , من بعد استخدام دام اسبوعين لاحظت أن التجاعيد و الهالات حولين العينين فلت بنسبة 50% أستخدمه ف الصباح.

بالنسبة للتقشير, أستخدم hollywood style deep cleansing بنكهة الخوخ , هذا أحسن مقشر للوجه استخدمته , منعش و ينظف البشرة عدل و الاحسن أنه مقشر و مرطب , يعني ما يسبب أي جفاف عكس المقشرات الثانية و ريحته حلوة جدا. 
و بالنسبة للشفايف , أقشرها بالسكر و زيت الزيتون , أحطه عليها و أجيب فوطة ما تكون ناعمة و لا خشنة و أفركها لحد ما أحس أن كل الجلد الميت انشال, بعده أجففها و أحط عليها مرطب من بالمرزتركيبة زبدة الكاكاو بنكهة الكرز و الشيكولاة الداكنة, مثل ما تعرفون ترطيب زبدة الكاكاو مرة عالي و راح يرطب الشفايف و يمنعها من التشقق.

تشقير الوجه و الشفايف أسويه مرتين ف الاسبوع بس.

هنيه نكون خلصنا كيفية العناية بالوجه اليومية و الاسبوعيه , أتمنى تحبون الطريقة و المنتجات اللي عرضتها.
و لاتنسون الكومنت و أي سؤال أنا حاضرة. أستودعكم لله.